रुकुम पूर्वको सामुदायिक रेडियो पूर्वी रुकुम १०३.२ मेगाहर्ज आफ्नो नियमित प्रसारणको सफल सात वर्ष पूरा गर्दै आठौं वर्षमा प्रवेश गरेको छ । “गणतन्त्र नेपालको समावेशी आवाज” भन्ने नारासहित सञ्चालित सामुदायिक रेडियोले यस अवसरमा प्रेस विज्ञप्ति जारी गर्दै सम्पूर्ण श्रोता, शुभेच्छुक तथा साझेदारहरूप्रति आभार व्यक्त गरेको हो ।
२०७६ सालको गणतन्त्र दिवसदेखि प्रसारण सुरु गरेको रेडियोले ग्रामीण क्षेत्रका नागरिकको आवाजलाई प्राथमिकतामा राख्दै सूचना, शिक्षा, स्वास्थ्य, महिला तथा दलित सशक्तीकरण, मानवअधिकार र स्थानीय सरोकारका विषयलाई निरन्तर उठाउँदै आएको जनाएको छ ।
सिस्ने गाउँपालिका- ५ काजिन्द्रामा रहेको रेडियोले एफ.एम. प्रसारणसँगै डिजिटल प्लेटफर्म, सामाजिक सञ्जाल तथा भिडियो सामग्रीमार्फत नयाँ पुस्तासम्म पहुँच विस्तार गर्दै प्रविधिमैत्री सञ्चार अभ्यासलाई समेत सशक्त बनाएको उल्लेख गरिएको छ ।
रेडियो सञ्चालक समितिका अध्यक्ष लाल बहादुर बिष्ट प्रभातद्वारा जारी प्रेस विज्ञप्तिमा रेडियोको यात्रामा साथ, सहयोग र विश्वास प्रदान गर्ने सरकारी तथा गैरसरकारी संघसंस्था, सुरक्षा निकाय, राजनीतिक दल, शिक्षक, बुद्धिजीवी, पत्रकार, नागरिक समाज, विज्ञापनदाता तथा सम्पूर्ण श्रोताप्रति धन्यवाद व्यक्त गरिएको छ ।
रेडियोले आगामी दिनमा अझ जिम्मेवार, विश्वसनीय र समावेशी सञ्चारमार्फत समुदायको आवाजलाई थप सशक्त बनाउँदै अघि बढ्ने प्रतिबद्धता समेत जनाएको छ । त्यसैगरी आज बार्षिकोत्सवको अवसरमा रेडियो पूर्वीरुकुमका बोर्ड कमिटी अध्यक्ष तथा भूमे गाउँपालिकाका अध्यक्ष होमप्रकाश श्रेष्ठले केक काटेर आठौं बार्षिकोत्सब मनाईएको छ । समाजसेवी चन्द्र रसाइली, बार्षिक उत्सबमा रेडियो सञ्चालक समिती अध्यक्ष लाल बहादुर बिस्ट प्रभात, रेडियो स्टेसन मेनेजर बसन्त बाठा मगर , रुकुम पूर्वका अन्लाईन सञ्चारमाध्यमहरुका सन्चालकहरु, रेडियोका कर्मचारीहरु लगायको उपस्तिथि रहेको थियो ।
प्रतिक्रिया