स्नान गर्न पसे, फर्किएनन्

२८ साउन, रसुवा — गोसाइँकुण्डमा स्नानका क्रममा आइतबार दुई जना तीर्थालु बेपत्ता भएका छन्।

बेपत्ता हुनेमा मोरङ जिल्ला विराटनगरका करिब २८ वर्षीय सुजन ढकाल र मोरङकै बेलवारीका मनोज न्यौपाने रहेका छन्। जिल्ला प्रहरी प्रमुख हेमबहादुर शाहीका अनुसार तीर्थालुहरू गहिरो भागमा स्नान गर्न पसेपछि डुबेको आशंका गरिएको हो।

घटनापछि नेपाली सेना (श्रीनाथ गण), नेपाल प्रहरी र सशस्त्र प्रहरी बलका अधिकारी तथा जवानहरूलाई आइतबार नै घटनास्थलतर्फ पठाइएको छ। खोजी कार्य तीव्र गतिमा जारी छ।

गोसाइँकुण्डमा जनैपूर्णिमाको अवसरमा ठूलो संख्यामा भक्तजन स्नान गर्न जाने परम्परा छ। यस्तै भीडभाडबीच दुर्भाग्यपूर्ण रूपमा दुई युवा बेपत्ता भएका हुन्।