धराली गाउँ बाढी विपत्ति: चार जनाको मृत्यु, ५० भन्दा बढी बेपत्ता

भारतको उत्तराखण्ड राज्यअन्तर्गत उत्तरकाशी जिल्लाको हर्षिल क्षेत्रस्थित धराली गाउँमा साउन २१ गते मंगलबार बिहान भीषण बाढीको कारण ठूलो जनधनको क्षति भएको छ। खीरगंगा गदेरेमा भएको बादल फाट्ने घटनापछि आएको लेदोसहितको बाढीले गाउँका संरचनाहरू बगाउँदा कम्तीमा ४ जनाको मृत्यु भएको पुष्टि भएको छ भने ५० भन्दा बढी व्यक्ति बेपत्ता रहेका छन्।

बाढीले गाउँका घर, होटल, बजार क्षेत्र, एक आर्मी क्याम्प र सडकहरू बगाएको छ। हर्षिल-धराली सडक सम्पर्क पूर्णरूपमा विच्छेद भएको छ। बगाइएका क्षेत्रमा अझै पनि मानिसहरू पुरिएको वा बगेको आशंका गरिएको छ।

घटनापछि भारतीय सेना, ITBP, SDRF र NDRF का उद्धार टोलीहरू खटिएको छन्। हेलिकप्टर, डोजर, उद्धार कुकुर र अन्य उपकरणको सहायतामा खोजी र उद्धार कार्य तीव्र गतिमा अगाडि बढाइएको छ। स्थानीय बासिन्दाहरूलाई सुरक्षित स्थानमा सार्ने काम भइरहेको छ।

प्रत्यक्षदर्शीहरूका अनुसार बाढी एक्कासि आयो। “ठूलो आवाज आयो, अनि केही क्षणमै माटो, ढुङ्गा र भेल गाउँभरि पस्यो,” एक बासिन्दाले बताए।

भारतीय मौसम विभागले यस क्षेत्रमा पहिल्यैदेखि भारी वर्षाको रेड अलर्ट जारी गरेको थियो। अझै केही दिनसम्म भारी वर्षा हुने सम्भावना भएकाले जोखिम कायमै रहेको जनाइएको छ।

उत्तराखण्ड राज्यका मुख्यमन्त्री पुष्कर सिंह धामीले घटनाप्रति दुःख व्यक्त गर्दै मृतकप्रति श्रद्धाञ्जलि अर्पण गरेका छन्। उनले राहत तथा उद्धार कार्यमा ढिलाइ हुन नदिन निर्देशन दिइसकेका छन्।

धराली गाउँको यो घटना उत्तराखण्डको पछिल्ला समयको सबैभन्दा गम्भीर प्राकृतिक विपत्तिमध्ये एक बनेको छ। उद्धार कार्य जारी रहेको छ र मृतक तथा बेपत्ताको संख्या अझै बढ्न सक्ने अनुमान गरिएको छ।

स्रोत
Times of India, The Indian Express, ABP News, Hindustan Times
मिति: २०८२ साउन २१ गते, मंगलबार (सन् २०२५ अगस्ट ५)